5位數道具嬰屍「逼」出真眼淚鄭嘉穎台慶讓賽為譚俊彥助攻

藝人鄭嘉穎於台慶劇有非一般演出，不過卻表明「讓賽」，希望今年視帝頒給生力軍。他又大讚劇中拍檔鍾嘉欣表現，感激遇上這位「最佳拍檔」，又指無綫豪花5位數製作道具死嬰，幾可亂真。

鄭嘉穎、羅子溢及周家怡等昨午出席無綫台慶劇《星空下的仁醫》結局篇宣傳。嘉穎於劇中與鍾嘉欣擦出火花，前晚交代嘉欣因診症時感染病毒致胎死腹中，嘉穎不欲她自責，決定偷改醫療報告隱瞞一切，期間2人先後失控痛哭，成網民熱話，嘉穎直言慶幸遇上嘉欣這位拍檔。

對於劇集受歡迎及演技再獲讚，嘉穎連聲多謝觀眾支持：「個假BB製造得好逼真，直頭可以拍close up，道具組好犀利。（花咗5位數字喎！）依家物有所值啦！」談到這場爆喊戲，他坦言：「事前我同導演講，小弟一、兩take OK，去到第三take就真係做喇！我第一take嘅眼淚同感覺最真，要求近鏡去拍。」前晚劇情將戲味推高，令他被睇好有機會再奪視帝，他卻表示：「我比較希望畀啲未攞過嘅，可能會改變佢哋一生，好似Shaun（譚俊彥）演得好好，仲有《拳王》嘅張振朗，淨係睇佢操肌咁辛苦都值得攞獎。大家鍾意套劇同我嘅演出已經好開心，多謝大家支持。」更透露聽聞監製有意開拍《星》續集。

羅子溢寧願返工唔湊女

而羅子溢的角色濫藥，面對遭除牌的可能，他表示：「今次係好大嘅挑戰，但可以話畀大家聽happy ending。（同現實一樣事業愛情兩得意？）我覺得現實生活比劇情更加美滿，簡直父慈女孝！」談到1歲半大的愛女小珍珠，他卻苦笑：「佢好百厭又唔肯食嘢，頑皮嘢學晒我。湊佢真係好攰，我寧願返工，辛苦太太。（報名返學未？）報咗兩間都OK，仲要係心儀之選。」他又表示近日忙於上網預訂外傭檢疫住處：「要請多個姐姐幫手，唔想太太同外母咁辛苦。依家請工人好難，我每星期一早起身撳電腦訂房，但冇次成功。」而周家怡在場獲不少粉絲舉牌支持，她表示無意效法嘉欣的角色未婚懷孕：「連男友都未有！睇嘉欣痛失BB嗰場戲，我喊到豬頭，同埋個道具BB真係好真，我叫監製要小心處理，唔好亂丟嚇親人。」