理性對付感性張寶兒袁偉豪鬧交增進感情

無綫藝人張寶兒，由為人熟悉的《學是學非》、《姊妹淘》主持，到近期在台慶劇《星空下的仁醫》亮相，其轉變令人耳目一新。拍攝對她而言相當有新鮮感，對於首次拍劇沒有老公袁偉豪在旁，她笑說：「呢套劇終於脫離到佢，拍嗰陣都特登冇問佢意見，想用自己嘅能量去試吓，睇吓出嚟有咩感覺。不過，拍完呢套之後拍《OPM》反而放開咗，希望自己進步，所以都有請教『前輩』，哈哈！」憑「是非精」響朵的她直言較喜歡演戲，謙稱沒有當主持的急才，觀眾所見的效果，實有賴團隊配合。

「佢會讓吓我嘅」

嫁作人妻一年，她稱與老公袁偉豪經歷過拍拖的磨合，目前婚姻生活美滿，更認為鬧交有助提升感情關係，她笑說：「梗係會有嗌交，自己會理性啲，等佢發洩完，大家再諗解決辦法。不過，佢見我發脾氣亦都會收，會讓吓我嘅。」成為袁太後，寶兒成熟不少，會正面去解決摩擦，她說：「拍拖訓練得多啲，磨合咗先結婚，以前我亦都係感性嘅人，有情緒就想發出嚟，但係另一半係演員，感情仲豐富，如果兩個都係咁就會嘈到拆樓，咁亦都唔健康，發脾氣又傷身、又傷害關係，大家都有改善，都會諗多啲。」