大讚好勁唔使鬆章湯洛雯竹戰未來奶奶冇面畀

藝人湯洛雯與男友馬國明感情穩定，見埋家長，她曾試過與未來奶奶打牌，大讚對方牌章好勁，不用她鬆章。她又坦言未有計劃與男友夾份置業，亦不會要求「有樓揸手」才答允下嫁。

湯洛雯（靚湯）、高海寧（高Ling）、戴祖儀及薛家燕等，昨出席無綫新節目《麻雀鬥室三缺一》拜神。靚湯談到開枱時說：「我同朋友打好細。（有冇同男友馬國明屋企人打牌？）試過，伯母（牌章）好勁。（有冇鬆章？）唔使啦，咩年代？總之打完佢都仲有同我傾偈，冇杯葛我。」

冇錢同馬國明夾份買樓

對於馬國明有意再置業，她說：「佢有留意樓市，鍾意投資磚頭。（同你夾份一齊買？）唔會！因為我冇錢喇！同屋企人買嗰層樓負擔已經好大。（叫佢加埋你個名？）唔使！我唔會因為咁影響大家感情，我都有同佢講，第時一齊住，租樓都冇所謂！」記者打趣問她今年傳了多少次婚訊，她笑說：「唔記得喇！可能嚟緊傳我哋隱婚喇！最搞笑係朋友唔係向我求證，而係恭喜我，或者到成事，大家反而唔相信！」

高Ling近日花了兩個半小時駁髮，談到變身長髮姑娘，她指外界反應好壞參半：「好多男仔鍾意我短頭髮多啲，女仔就鍾意長頭髮。長髮多啲唔同嘅嘗試，希望畀監製們見到我嘅新造型，安排多啲新角色畀我。（長髮吸引唔到異性？）有都唔係呢度講啦！」至於台慶夜服飾，她說：「交由造型師負責。（性感亮相？）唔知，睇吓佢揀咩裙，不過潮流興養生，女仔唔好凍親呀！」

至於戴祖儀則大讚好友涂毓麟牌品好：「同佢打牌即使輸好多都唔會發脾氣，所以如果有好女仔，我都會介紹畀佢。（佢唔係你杯茶？）佢內心都大男人，鍾意啲小妹妹，而我就比較喜歡大哥哥。」