被王丹妮造型嚇親 古天樂勾起回憶爆喊連場

古仔談到拍攝時最難忘的一幕：「喺紅館後台帶佢（扮演梅艷芳的王丹妮）出台嗰幕，明明知道佢患重病已經撐唔住，但依然死撐。（喊咗出嚟？）好多場戲都喊，好多回憶勾番晒出嚟。（有場畀王丹妮嚇親？）佢着住紅色旗袍，喺轉角行出嚟，同梅姐真係十分神似。」林家棟則說：「我集齊晒梅姐所有嘅唱片，要求佢幫我簽名，留到依家。梅姐係個好有毅力同努力嘅人。」

王丹妮表示今次電影登上大銀幕，有賴團隊盡最大的努力：「希望觀眾鍾意，睇完戲返去重溫梅姐嘅作品，將佢嘅精神傳承落去。（好大壓力？）我諗最大壓力係準備嘅時候，正式開鏡就冇諗咁多，教我演戲嘅老師講過要相信自己。」至於票房壓力，她坦言：「電影公司老闆曾經講過，今次係佢嘅心願同承諾，其他嘢唔係考量之內，希望透過部戲令大家了解梅姐更多，呢個係我哋嘅使命。」