陳柏宇恨再追「前世情人」

歌手陳柏宇昨日到電台宣傳演唱會，坦言近日雖然忙碌，但仍會抽空陪伴3歲女兒Abigail：「早幾日同個女去朋友嘅生日Party，同佢玩到出晒汗！」並指囡囡有時會令他「冇晒符」：「佢好夜先瞓，又多花臣，喺床會玩手指、唱歌、細細聲喺你耳邊講嘢，又急尿、又飲水，乜都有！我個女得兩個模式，一係就全速前進，一係就冧偈！（夠唔夠膽生多個？）想㗎！不過冇特別計劃，隨緣啦。（追仔？）仔女都冇所謂，但覺得女易搞，起碼衫唔使買多次，又唔使整多間房。」