何依婷派「好人卡」擋緋聞 胡鴻鈞變性爭視后

台慶劇《十月初五的月光》一眾演員胡鴻鈞、何依婷、羅天宇及蔚雨芯等，昨日親臨拍攝場地流浮山舉行造勢活動。問到身為男主角的胡鴻鈞會否緊張收視？他表示保持平常心：「實會有人做比較，希望係良性，將呢部經典再昇華，而唔係失禮。」提到上屆奪《勁歌》歌王，台慶是否想奪視帝？他抵死表示想「變性」：「視后得唔得？絕對冇諗呢啲，個角色大家鍾意已經係最大Bonus。」

講到前日完成《叱咤》記者會就速逃，是否抗拒與傳反目的「同性密友」許廷鏗受訪？他澄清沒有躲避任何事，指2人在後台有打招呼，只是因時間緊迫所以沒閒談，而「閃人」是因為趕往拍MV，直踩至昨晨5時，他表示︰「我哋（與許廷鏗）有影大合照㗎！（中間隔10個人喎！）下次叫其他人行開！（見到你係咁望向許廷鏗個方向？）我係望住喺遠處呼喚我嘅Fans啫！」

至於「緋聞情侶」羅天宇及何依婷首次在公開活動上碰頭，大方一同受訪，女方承認傳緋聞後有點不快︰「我哋真係只係做嘢，亦好專業，覺得被屈好冤枉！好彩我係金魚記憶，好快唔記得。」並大讚對方是好仔，並非外界所稱的「女神收割機」：「佢好友善、唔花心、唔會周圍溝女。」天宇多謝她讚賞，並澄清︰「張相話我哋拖手，但我對手明明冇拖，只係借題發揮，今次好似累到佢咁，我都唔好意思。」問到之後是否真有機會發展？他只表示目前以工作為主。