公園密會斷正！ 黃翊傳搭上人妻 唔驚老婆嬲

去年被指是林曉峰和康子妮婚變第三者的黃翊，最近又跟人妻蔣嘉瑩傳撻着，兩人各自育有一子，有指嘉瑩老公到內地做生意，因疫情已久未返港，夫妻關係早現暗湧。日前黃翊跟嘉瑩密會斷正，打完邊爐又摸黑漫步曬月光，更走到公園暗角談心分享電話私密，而且連日來都有來往。不過他們異口同聲否認，聲稱是經理人與歌手關係，因忙於籌備本月底演唱會才日日見面。

黃翊昨日受訪時為自己平反，指當日記者會後跟歌迷會會長一齊食飯，離開時收到音樂總監來電，才走到路過的公園坐低聽歌：「又唔係攬住又唔係Kiss。」並重提與康子妮的緋聞：「之前已煩煩哋，有女性喺隔籬做嘢實有呢啲。（要避忌吓？）唔使，都係正常做嘢。」他不擔心有影響，還笑言當作演唱會宣傳。問到可擔心太太陳存正會嬲？他說：「頭先我有講佢知，佢話唔好理，做嘢總會遇到啲困難，不過又係啲唔係咁好嘅嘢。（你知唔知嘉瑩同老公有冇問題？）冇聽過，唔知。」又稱與嘉瑩沒簽經理人合約，因大家都喜歡音樂，口頭上合作已經半年。

而嘉瑩否認婚姻有問題：「搞笑！不嬲都冇提老公，因為佢係圈外人。」跟舊公司解約的她表示轉做幕後：「我係黃翊經理人，我又有正職，男女一齊做嘢唔係第一日嘅事，被人寫吓有咩所謂，做得娛樂圈都慣啦，所以我好理解。（驚影響夫妻感情？）梗係唔驚啦！我老公知我係佢經理人，連我個仔都知，我工作大把男同事，全職份工日日都同男同事一齊都冇人影。」