Tube Top搶鏡先勝一仗！ 林夏薇有信心贏視后 馮盈盈認輸

林夏薇（薇薇）、馮盈盈及周嘉洛等昨午錄影無綫節目《男神廚房》，薇薇以Tube Top上陣，盈盈則「包到冚」。薇薇被問到今年提名視后的信心時，她坦言：「鍾嘉欣同黃智雯表現好好，其實觀眾嘅肯定同鼓勵先係最緊要，角色有討論度已經好滿足。（邊個係勁敵？）個個都係，都有我值得學習嘅地方。（對自己有信心？）信心一定要有，尤其《七公主》係我入行以嚟身心最大嘅挑戰，而《逆天奇案》就換嚟『國民女友』嘅稱號。」在旁的盈盈聞言笑指自己同樣憑《逆》劇被叫「國民妖精」：「我同時有份演《智能愛人》，但同呢兩套劇嘅女主李佳芯同薇薇比較，我一早已認輸啦！」

談到廚技，薇薇冧爆地說：「我屋企有男神私房菜，我老公好鍾意煮嘢食。（你自己煮嘢食叻唔叻？ ）我有跟老公學，最撚手係杏仁炒雞丁，因為老公鍾意食。」盈盈則表示有跟爸爸學炒滑蛋。

周嘉洛則自爆廚藝一般，錄影時「表演」川椒牛肉炒意粉，但最後「太乾身」還錯手落重鹽，食到主持鄭裕玲面容扭曲！正忙於拍攝新劇《四十二章經》的他，身形消瘦不少，他說：「我自己都覺得，所以呢排開工都帶住麵包，得閒就會食，唔想自己再瘦落去，依家好似食極都唔肥咁。」劇中他演雙重人格的角色：「依家要經常『變臉』，開工前嘻嘻哈哈，一拍攝就變得嚴肅同認真。」現時劇接劇傳獲公司力谷上位，他說：「都唔知真定假，但聽到咁講都開心嘅，最緊要做好自己，真係暫時都未知幾時『回家』（重歸處境劇《愛·回家之開心速遞》）。」