下月返加拿大！ 鄧佩儀負聞纏身 崩潰爆喊

鄧佩儀、譚俊彥、朱敏瀚及蔣家旻等昨日現身荃灣為《換》劇宣傳，對於負面新聞，鄧佩儀說：「多年嚟自己一直都努力工作，當睇到報道時有少少崩潰咗，依家冇事啦！（覺得委屈？）有新聞價值始終係好事，幫套劇宣傳。（係咪一直冇人搵你拍劇？）因為加拿大嗰邊有事要處理，半年前已請定假，其實一直都處理緊，所以呢段時間有劇同綜藝節目都接唔到，原本9月就飛，但想做埋套劇宣傳先，所以改咗11月先返加拿大。（結婚生仔？）絕對唔係，哈哈！係屋企開心事嚟，不過唔透露住。」她指未清楚處理多久，所以未知歸期。

而有份拍攝該劇的蔣家旻亦替拍檔說好話，指拍劇期間大家也辛苦：「因為我哋3個女仔戲份都多又密集，每次問佢攰唔攰都話唔攰唔眼瞓、頂得到，佢真係好勤力。」

活動上，譚俊彥獻唱劇集歌曲，指已很久沒有公開演唱：「上次係2年前《包青天》，好耐冇見Fans，一直想搞聚會，但又怕疫情而冇搞，佢哋一路都好支持我，之前我啲劇被人抨擊，佢哋都有傳訊息安慰我，以前我比較收埋自己，依家學識咗佢哋錫我，我要錫番佢哋。」