笑老公喊到滴鼻水 陳詩欣升呢人妻 約定余香凝入產房

陳詩欣（Eunice）昨日與圈外男友陳爾正結婚，余香凝、蔡嘉欣及鍾晴等擔任「索爆姊妹團」，鍾培生則做伴郎。新娘前晚進行上頭儀式，一對新人昨晨依足傳統穿上中式禮服，在酒店接新娘、向長輩敬茶等，行頭充足的Eunice戴有6對龍鳳鈪，她向姊妹團派利是，眾人即時眼濕濕。下午他們在教堂行禮簽字，新娘披上白色低胸婚紗，讀誓詞時一對新人忍不住感動爆喊，而禮成後拋出的花球由蔡嘉欣接到。

Eunice與老公昨晚在酒店大排筵席，邀請240位賓客分享喜悅，包括張寶兒、組合Super Girls成員Cheronna、Yanny及Jessica等。新娘身穿淺藍色低胸露背拖尾晚裝，化身「Elsa公主」，大騷3吋事業線，佩戴結婚及3卡求婚戒指，並以閃爆耳環及頸鏈點綴，明艷照人，她與老公應記者要求連咀3次。提到行禮時相當感人，Eunice笑言沒想過老公會喊：「估唔到佢講誓詞連鼻涕都滴埋，我都係第一次見，又見到爸爸眼濕濕，見到呢個場面我都有淚崩，一直以為自己唔會喊，因為喺屋企已經練習咗好多次，點知結婚真係好感動。」

她坦言未有生B計劃，想先過二人世界，又希望與余香凝約定：「佢生第二胎時我就生第一胎，大家可以一齊大肚、一齊入產房，跟住一齊減肥。」她指工作忙碌的老公承諾以後會早點回家慰妻，又自言婚後不會做少奶奶，會繼續工作，而且不會減少性感，老公亦不介意，最緊要靚及健康性感。

至於余香凝生B後極速收身，透露準備了禮物送給相識10年的新娘：「佢叫我上台講嘢，希望可以感動到佢喊，其實佢着褂時我已經想喊。」提到約埋生仔，她笑說：「佢畀我嘅利是後面寫咗好多嘢，話要一齊生BB、入產房同埋減肥，睇吓幾時得閒先。（佢話你生佢先生？）我得閒就生喇！依家我都好唔捨得個女，但要做嘢，下個月復工。」而張寶兒大讚新郎寵妻，問到是否老公袁偉豪不愛錫她？她笑說：「唔係，我聽話啲，我寵夫。因為Eunice話事啲，佢老公好錫佢，但每對夫妻關係唔同。」