情侶裝慶生咀唔停 郭富城拍戲爆手骨 向老婆撒嬌

城城昨午在尖沙咀出席活動，由於埋首電影拍攝，他已至少3個月未有公開露面。談到前日56歲生日，他繼續穿「慶生戰衣」與太太放閃，又獲贈一家四口造型蛋榚，他開心說：「簡簡單單食餐飯啫！不過兩個女送吻畀我，即刻冧晒！（太太呢？）總之成家大大細細都錫我啦！（生日願望？）身體健康、事事順利、世界和平，同埋快啲過番正常生活。」

剛拍畢《掃毒3天大地大》的他，下月便要投入另一電影的演出：「呢個角色我從來冇做過，係黑色喜劇，我扮演一個大賊，同林家棟、任賢齊等合作。今次係支持新導演，我畀佢嘅劇本打動，我嘅造型好特別。（會認唔出嗰個係你？）會覺得『好似我』囉！到時會去廟街拍槍戰，想透過鏡頭話畀旅客知，依家嘅香港著名景點變成點。」

談到《掃》片在有驚無險下完成拍攝，前後有多人受傷，城城亦認同：「大家想製作做到最好，認真下難免有意外發生。話明意外即係意料之外，其中一場戲交代我踢對面嘅人，點知拍完手背骨爆開流血，仲要流足半個鐘，傷口好深！初頭諗極都唔明點解，應該係企喺我旁邊嘅劉青雲着住件皮褸，條拉鏈好利，唔覺意被割到！」

問是否「報喜不報憂」，不敢向太太報告傷勢？他說：「又唔會喎！我乜都同佢講，例如拍槍戰、翻車戲咁，以前就話冇得分享啫！依家有人聽我講，係最幸福嘅。」而大女會跟着他的歌曲跳舞：「我試過喺屋企播我嘅歌，佢知道係爸爸唱嘅都微微嘴笑，好開心佢有藝術細胞，試過同佢一齊親子畫畫，但佢投訴我畫出界！」