食無定時胃出血 呂慧儀入院體檢 囝囝誤會去度假

呂慧儀、劉丹、滕麗名、吳偉豪、謝嘉怡及蘇韻姿等，昨日到將軍澳電視城出席《愛．回家之開心速遞》宣傳活動，席間公布劇集邁向1,500集。談到呂慧儀早前在街上暈倒，她透露做了身體檢查：「嗰日湊緊仔，諗住去攞嘢，點知突然眼前黑黑哋就暈咗，翌日仲照返工，之後都去咗做body check，心臟、個腦冇事，醫生話係胃發炎，有啲胃出血，都係啲都市人常見嘅毛病，食無定時。」

她續稱：「好彩隔籬有兩個媽媽朋友扶我起身，醫生話可能係啲神經因子send錯signal畀個腦，所以突然血壓低，我之後都會注意均衡飲食，多啲休息同做運動。（唔停工休息？）趁嗰兩日冇廠去咗做body check，唔想麻煩其他人。」問到囝囝可有擔心？她笑言：「冇，我去做body check，佢仲以為去staycation，我叫佢攞埋啲功課去醫院，畀我檢查同簽手冊。」

吳偉豪透露9月已重返校園，相隔6年修讀工程學系副學士：「好辛苦，但想讀番書係因為我始終覺得中學學歷唔高。」問到可有被女同學「集郵」？他笑言：「冇，大家專心讀書。」而謝嘉怡表示已習慣拍劇：「但廣東話有啲難，我啲情緒、表情又未夠誇張，要再練多啲。（搵個男朋友教廣東話？）唔使，同爹哋練就得啦。」