克服畏高 為演唱會造勢 張敬軒攀登246米商廈 亞洲歌手第1人

張敬軒昨日宣布今年12月23至27、30至31日及明年1月1至3日，於紅館舉行10場《The Next 20 Hins Live in Hong Kong張敬軒演唱會》，門票將於10月26日以信用卡優先訂票。今次軒仔玩命拍演唱會海報，在鬧市攀登一幢最高點逾246米的商廈避雷針頂，震撼大家眼球！

海報意念主要是軒仔回顧過去20年，經歷不少高低難關，希望把這些年的領悟放於演唱會海報中，最終作出大膽挑戰，嘗試克服自小已有的畏高症，並帶出：「人生冇回頭路，面對困難，我哋應該攞勇氣去克服，不斷前行，不斷向上，先真切感受到生命帶來美麗風景嘅信念。」當得知與商廈達成協議後，軒仔搞笑說：「尾龍骨先開始識寒起上嚟。」公司即為他請來國際級攀爬教練，並展開攀石訓練，主辦單位更特別為今次活動購下過億元的保險。

軒仔透露最初攀石，爬上15米高已腳軟，仍要咬緊牙關頂硬上，之後教練用一條大麻繩將他吊在懸崖邊，讓他克服畏高，當時他腦中閃過：「自己有咩事點算？父母又點算？」拍攝當天，他笑言從未試過出這麼多手汗，大腦一片空白，邊爬邊腎上腺飆升：「當時我只有咩都唔好去諗，不停同自己講，你得，你一定得，好快就到！」

爬上針頂稍作休息，軒仔坦言感覺神奇：「順咗條氣，先敢放眼望出去，真係奢侈到不得了，冇人可以同我瓜分呢個時刻，得我一個可以享受到嗰種奇妙同快樂，當時正正係日落，有啲煙霞，重有鷹喺身邊飛過，好似對我虎視眈眈咁。成個城市好安靜，只得少少汽車聲、風聲，感覺好奇妙、好靚，好難形容。」成功拍完海報，也戰勝畏高症，他希望大家都能有所領悟：「每個人生活之中，一定會有失望同挫折，但無論生活中遭遇上咩困難，唔好放棄，你肯畀自己企起身、肯努力向上，一定會有最靚風景等緊你。 」

大會將軒仔這個可一不可再的人生創舉拍攝下來，製作成NFT作品拍賣，善款扣除必要開支後，會捐予軒仔選定的3間慈善機構，幫助有需要的人。