焗買8萬戰衣 被經理人掟杯 江若琳首度答辯 爆喊休庭

昨日首次出庭答辯的江若琳（原名江玲）被控方大律師質疑聲稱在寰宇工作2004年到2014年一蚊收入也沒有之說，她同意有收取約280萬藝人墊支，但並不認為是出糧，形容是借錢。她又稱2008年突然收到稅單高達30多萬元，令全家人震驚。

控方律師質疑江若琳花8萬元買裙出席金像獎頒獎禮，她則說：「有搵過贊助商嘅裙但唔啱，其實每次出席活動，自己冇權去選擇着咩衫，服裝係由造型師、經理人決定。呢次公司話一定要着貴衫，因為對手係楊千嬅、周迅等，所以唔可以失禮。自己覺得好貴，人生未買過咁貴嘅裙。問公司可唔可以出一半當獎勵，但楊劍標話唔會。依家衣櫃嘅衫加埋都冇8萬。」談到這些事她語帶哽咽，庭上要以紙巾抹眼淚。

江若琳又被質疑認為工作愈多，欠公司的錢只會愈多，她解釋未有尋求法律意見，因簽約時有明文規定不能透露合約內容，但最終也在2014年尋求法律意見，她爆出原因：「我經理人向我擲玻璃杯，我只係得兩個選擇，一係就搵律師、一係就報警。」

控方律師追問被擲杯也不報警求助？她爆喊說：「律師都提議我報警，但係同經理人合作咗10年，到今日我都仲係想好來好去，從來冇諗過會去到咁。」她喊到收唔到聲，法官要休庭讓她平復情緒。之後控方大律師再重問她為何不報警一事，她聞言激動地哀求：「可唔可以唔好再提呢件事，求吓你。」此外，又指公司曾建議她將全部牙剝去改植牙會變靚更快有工作，但當時因未成年發育未完才改箍牙。案件明日繼續審訊。

案件編號：HCA 1225/2014