無綫破格真人騷 王賢誌搞男男配 預咗捱鬧

隨着近年不少藝人先後「出櫃」，甚至同性通婚，如鄧達智、王賢誌（Vinci）等，同志似逐漸為人所接受，勇於接受新嘗試的無綫，將破格製作首個男男配真人騷節目《仔仔一堂》，並定於下月在J2台播出，邀得Vinci擔任監製及主持。日前他率先於社交網分享首日拍攝情況，拎住香檳自拍的他寫道：「本人電視生涯最重要的一章，香港電視史上最破格之嘗試。」更hashtag仔仔一堂。

據知節目將有10位來自各行各業、年齡介乎20到30多歲的單身同志參加，平均質素甚高，如社交網有10萬Followers的「網紅」藍源瑋、「嫩版王浩信」Louis、廚神Kenny（楊平）等。

Vinci昨日受訪時表示一直想為同志發聲，認為同志婚姻合法化不容易，若大眾接受會更好，結果與高層曾志偉及C君開會研究後，對方欣然接受建議，Vinci並親自挑選參賽者：「雖然唔知可唔可以成功配對到，但節目除咗呢樣嘢，亦有帶出正面訊息，會去探訪老年同志，聽佢哋講吓艱苦經歷，我自己都係過來人，39歲先開始拍拖，明白搵另一半唔易，所以呢個主持位冇人可以勝任。」

Vinci認為無綫的平台對大眾較有影響力，故選擇與之合作，被問到有沒有擔心會對參賽者動情？他說：「我生得佢哋出，唔擔心，本身都識好多呢啲朋友，要動情一早動咗。（有同志藝人嘉賓？）研究緊，唔一定上嚟要承認係同志身份，都係分享多啲，其實個節目出街預咗畀人鬧，但我只想話畀同志聽，佢哋應該走出衣櫃。」