周啟生大聲疾呼 為子甘受委屈

歌手周啟生稱患有自閉症的21歲二仔周爵疑在宿舍被虐打，前晚偕現任太太到黃竹坑警署報案。昨日清晨5時，他上載父子合照，留言：「較早前我作出咗一個重要嘅決定，完全冇影響我嘅初心，亦唔會動搖我嘅信念。如果事情只係關於我，就算要受千刀萬剮，我都可以一力承擔，但係為咗我心愛嘅寶貝兒子，就算點樣畀人委屈也在所不計。我要行出嚟大聲疾呼，我唔希望再有天使寶寶受到虐待。」警察公共關係科昨日指周姓男子就兒子被打案，暫列作「襲擊致造成實際身體傷害」處理；而周啟生指事件進入司法程序：「口供都落咗，我唔方便多講說話，多謝關心。」至於在網誌提及的性侵事件，他僅以兩個表情符號回應。