鄧佩儀唔敢劍指視后 譚俊彥瞓到懵墮騙局 失8千蚊

譚俊彥（Shaun）、鄧佩儀、張頴康、朱敏瀚及陳庭欣等，昨日宣傳無綫劇《換命真相》，被指與《魷魚遊戲》主角李政宰撞樣的Shaun不停被取笑，令他哭笑不得，但原來有苦自己知。

他自爆慘成騙徒目標：「打風嗰晚去咗《廉政狙擊》煞科宴，第二朝瞓到迷迷糊糊，收到短訊叫我更新資料，我Click條Link入面有晒我資料，就照指示入信用卡個Code，結果中咗陷阱，畀人碌咗8千幾蚊港紙。佢顯示係非洲錢，我好蠢冇留意，有打去有關公司查詢，佢哋叫我停咗張信用卡。我想提醒大家，因為呢排套劇Hit，所以啲人用呢樣嘢呃錢，大家要小心。」對於撞樣一事，他坦言起初感尷尬，因有市民因而與他合照，但他有感帶給大家歡樂，自己亦不禁會心微笑。

鄧佩儀首當女主角便殺入台慶劇問鼎視后，她笑言要排多幾年隊；而Shaun認為演員拿到「入場券」要了解自己位置，談及爭視帝，他說：「播咗先講，要睇人氣同運氣，我每年都好少少，今年的確有少少運氣，所以平常心，做任何嘢都要堅持做到最好。」

至於張頴康自言日常開支依靠八達通，財政大權交由太太麥雅緻掌控，連月入多少也不清楚：「以前八達通每次只可增值250蚊，呢排太太終於批准提升到500蚊，好開心！我好少上網購物，之前想買塊草皮鋪地，叫太太教我都被拒絕。」平日多揸車出入的他，直至早前太太入院生第3胎，才學懂用手機App Call車：「原來唔使做司機係咁舒服，一上車可以睇風景，眨吓眼又返到屋企。今日落雨，太太都批准Call車，但只係單程。」談及細仔「小蛋黃」快將滿月，他笑指已為自己準備好「滿月酒」，因陪太太坐月而戒酒1個月，期待解禁。