男神對決！ 張敬軒惡補廚藝 陳家樂最叻煮白飯

鄭裕玲（嘟嘟）、張敬軒、陳家樂、胡定欣與湯怡等，昨日出席無綫節目《男神廚房》拜神儀式，擔任總評判的嘟嘟表示要求食物色香味俱全，即使面對男神，味道不好一樣扣分！以西班牙紅蝦出戰的軒仔透露事前惡補廚藝，面對另一男神陳家樂，他大讚對方廚藝了得，自誇煮中西餐均不俗，但未敢輕言取勝。問到平日可有指導女傭「遮遮」下廚？他笑言：「畀佢自由發揮，我人好，佢執嘢企理就OK，同埋佢有上家政班，不過我出街食多。」

對於被軒仔讚廚藝出色，家樂笑言：「佢講笑啫！不過我煮白飯有30幾年經驗，煮到好似壽司飯咁。（緋聞女友連詩雅食過？）個個朋友都食過，不過呢排少煮，依家自己住。（係咪同居？）唔係。（除咗白飯，最叻煮乜？）煮雞蛋，童軍時拎過章，疫情期間煮嘢食都叻咗，煎牛扒OK。」而負責試食的湯怡質疑家樂廚藝，她說：「我仲有幾磅就去番未懷孕嘅磅數，今日佢會助我一把，因為佢負責煮，我負責食同評分，所以佢叫我食定止屙丸。」

至於曾在《美女廚房》獲劣評的胡定欣，笑言今次反過來為男藝人評分感覺特別：「喺咁Grand嘅場，就算唔好食，吐出嚟都要有儀態。（靚仔會加分？）呢個係視覺享受，我都希望搵到咁嘅人，實在太耐冇食過男仔煮嘅嘢食。（搵男友都要煮嘢叻？）我會努力。」