推Job輔導「小春雞」做哥哥 黎諾懿密謀轉型 撈埋幕後

黎諾懿有份演出的《刑偵日記》暫時是他最後一部戲劇作品，講到事隔10年再跟影后惠英紅對戲，他表示更加尊敬對方︰「有場戲講佢發癲咁嘔，拍之前佢真係匿埋灌水、食餅乾，然後同導演講OK就即刻扣喉，嗰刻我同自己講唔好NG，紅姐真係好專業，永遠做好晒功課，一嚟就『上身』，呢個係我哋後輩要學習。」

演而優則導，黎諾懿近2年一直計劃完成做幕後的心願︰「下年就係入行20年，好想喺第二個領域做啲嘢，見呢2年喺《逆境廚神》、《今晚請客》、自己品牌《懿想得到》都有少少成績，有啲經驗就希望喺綜藝試吓唔同崗位，可能係導演、監製，手頭上有啲計劃，遲啲同大家講。」

最近主持健康節目《醫醫，我不想再病了》的他認為人生應該多作嘗試，從而爆發出不同「小宇宙」︰「如果你畀我繼續做幕前，我只會慣咗用同一個模式做落去，冇咗新思維，但接觸唔同嘅崗位同人，再睇番演員呢個身份，可能有種新嘅睇法。」又指《愛．回家》中的「馬壯」便是活生生的例子︰「大家對呢個角色好深印象，其實我係跳完《舞動奇蹟》，個人睇嘢唔同咗，先會做到『馬壯』，覺得個人歷練好緊要，依家就係時間轉去另一個層面，繼續吸收歷練，對我嚟講綜藝節目唔同劇集，係易Handle、彈性又大啲，同埋我未有信心去導人演戲，反而導人做綜藝我有信心，知道觀眾鍾意睇啲咩。」