回港發展免相思之苦高鈞賢撻着富家女撐枱腳放閃

單身一段日子的藝人高鈞賢，被發現秘撻細12年的「億萬千金」、落選港姐吳玥彤，二人於社交網甜蜜放閃之餘，日前更孖住去撐枱腳，女方上車時獲男方輕扶玉臂，十分體貼。

近年主力於內地發展的前「香港先生」高鈞賢，去年之所以回來香港簽約邵氏，據知是為了不想與女友長期分隔異地。至於這位女友，正是曾參選港姐和亞姐的「億萬千金」吳玥彤，她家住淺水灣逾億元獨立屋，雙親於內地經商，其社交網亦不時晒周遊列國、坐遊艇出海、名牌手袋等富泰生活照。於芸芸照片中，卻發現高鈞賢蹤影，他連續兩年為伊人慶生，又送花又翹實，非常甜蜜。

吳玥彤曾選港姐

據知2人去年經朋友介紹一拍即合，男方出動珍珠奶茶攻勢成功打動芳心，約會幾次便墮愛河，雖然男方年紀大12年，仍無阻發展，早前更被本報拍到2人於銅鑼灣約會，當日吳玥彤悉心打扮騷肩上陣，一早到場搵定位等愛郎，戴上Cap帽的高鈞賢隨後匆匆趕至，期間男方滔滔不絕講話，氹得女友不時甜笑，他們逗留半粒鐘便埋單，乘坐高鈞賢準備的七人車離開，臨上車前，男友更細心挽扶吳玥彤。

本報就拍拖一事聯絡高鈞賢，他承認去年曾跟對方短暫拍拖：「上年返香港時的確有一齊過，大概一個月，之後返咗內地工作就分開咗，最近喺香港又約番見面，大家傾吓近況，不過都冇共識係男女朋友，係有好感，不過時間上係一個問題，所以都係Keep番做好朋友先。」吳玥彤亦說：「哈哈！依家都係專注事業先，留番啲空間畀我啦，多謝關心。」