「收割女神」冇得避 羅天宇：唔通唔傾偈

入行13年才於去年首嘗主角滋味，他自認性格內向又慢熱，對演戲有一定阻礙，為做好角色，往往會給自己無形壓力：「拍《跳躍生命線》嗰陣除咗失眠，仲試過一星期生咗幾十條白頭髮，啲淋巴塞晒，腫到凸起咗，劇都拍唔到！又試過緊張到明明劇本睇咗幾百次，但拍攝時個腦一片空白。」幸抗壓能力現已提高，期待挑戰打戲及反派角色。

工作以外，羅天宇最廣為人談論的是緋聞，更被封「女神收割機」，他坦言以前會因花邊新聞不開心及失眠，很擔心旁人目光，但現已學會接受：「冇辦法，控制唔到，唔通一Cut機大家就唔傾偈。（對女拍檔太好？）冇，有時會有啲避忌添！可能一開始有呢個名（女神收割機），只要見到我同女仔合照就會寫，當係茶餘飯後話題，畀人笑吓囉！」問到感情狀況，他表示現時單身，若拍拖會直認。