事業失意 想過自殺 吳沚默全靠惠英紅 嚇到你心寒

對於被讚演技開竅，她坦言很感激惠英紅：「紅姐真係做到收放自如，會突然嚇到你心寒，所以我更加要投入，要癲過佢！（有冇向佢偷師？）佢係我偶像，但因為劇入面係敵對關係，所以拍之前唔敢交流，驚會出戲，不過對打嗰陣佢有教我點樣唔受傷，仲堅持唔用替身落場。」提到被睇好爭獎，她表示從沒想過，自覺近年演戲比以前得心應手，不過尚有進步空間。

她自爆現實中曾因事業與愛情不順，加上與家人分隔兩地，導致情緒低落，甚至想過自殺：「有日我起身，張床係靠窗邊，我有一秒鐘諗過不如跳落去，咁就唔使再煩每日點過，好彩我即時意識到危險性，立即搵朋友陪，消除呢個咁危險思想。」續指當時有朋友為其遭遇落淚，令她明白世上還有人愛錫自己，從而激起鬥志。

她表示身邊不少後輩有類似情況，希望用自身經歷幫助他們走出困境：「好多後生仔都經歷緊呢個階段，當事業唔好、感情又唔順，好容易諗做傻事，我最近都有親人係咁，好想陪佢哋走出嚟。」又笑言以往抗拒媽媽的熱情舉動，現在反而更珍惜與家人相處，不再害怕講肉麻說話示愛。