唔覺門票貴 自誇物有所值 胡鴻鈞借蔡思貝 谷個唱

歌手胡鴻鈞、關禮傑、關楓馨、港姐冠軍宋宛穎等昨日在尖沙咀出席無綫節目《善心滿載仁愛堂》記者會。胡鴻鈞將於11月底在九展舉行兩場首次賣飛演唱會，他笑說：「今朝試過登入網站睇吓售票情況，係一直入唔到個網，唔通好多人買飛？哈哈。（網民質疑你九展騷收紅館票價？）唔知紅館價錢，但我覺得係物有所值，除咗可以睇我演出，仲可以睇埋綵排同影相，希望可以加場。」他透露演唱會除了唱歌更會跳舞，至於會否騷肌則先賣關子，問到緋聞女友蔡思貝會否捧場？他笑說：「應該會。（上台唱歌？）佢唱得咩？佢演得啫！」

關禮傑與關楓馨將於節目中父女檔演出，笑指歌曲還未選定，Rap唱新派粵曲也可以，關禮傑笑說：「佢就唔係五音不全，我就希望唔好唱咁高難度嘅歌。（離開無綫減少同女兒合作機會？）唔會，只係轉咗部頭形式。不過，如果同個女拍劇難度高啲，自己可能比較大男人，唔想畀柔弱一面個女睇到。」關楓馨則笑指與爸爸拍劇會較為尷尬，與其他人合作會較放鬆。至於宋宛穎透露將參與魔術表演，她笑言較少接觸魔術，亦未有男士借魔術表演追求她，故心情有點緊張。