期望太大 驚連累MIRROR Anson Lo出歌壓力爆煲 隊雪糕自救

人氣男團MIRROR成員Anson Lo的跳唱新歌《Megahit》在網上公開，火速衝破百萬點擊，原來他於新歌推出前緊張得壓力爆煲，因為他太鍾意首歌，期望太大，有時會自責做得未夠好，錄音時又驚高音唱不到，加上MV準備時間不足，種種壓力令他變得「騰雞」，擔心打亂MIRROR的出歌計劃，最終靠「喪食」減壓，他說：「嗰陣我一次食2、3支雪條或雪糕，畀自己放縱吓！」

媽咪是Anson Lo的傾訴對象，他形容媽咪是其「最強後盾」，也是心靈上的經理人。他大爆媽咪最愛攻擊他的弱點：「我每個訪問、演出，佢都會同我檢討，講好多看似殘忍、令人好唔舒服嘅評論，但我已經習慣，因為我好信任媽咪嘅意見，好多時都會搵佢幫手解決問題。」他自爆小時候會跟媽咪頂嘴，結果換來「大懲罰」，他說：「入到房跪低，媽咪會攞把好長嘅木間尺打我手板，大個就知頂嘴唔啱，其實媽咪都係緊張自己。」

新歌講述人與人之間難免有衝突，正好反映他與經理人花姐的溝通，他指雙方的睇法與價值觀很多時不同，但會理性分析及討論：「可能碰碰撞撞會有啲新嘅驚喜、花火。（吵大鑊？）都會㗎！試過太坦白同佢講嘢，令佢嬲咗幾日，但雙方都係為件事好。」問到年底樂壇頒獎禮，可期望攞男歌手獎？他自嘲：「我完全冇諗過自己有資格做呢樣嘢，唔係謙虛，我年資淺到咁，等我儲多啲作品先諗其他嘢。」