攞過視后好滿足 嘆感情難受控 李佳芯心急搵老公

視后李佳芯（Ali）昨日在銅鑼灣出席活動，對於外間大讚她在劇集《智能愛人》扮演機械人的演繹，睇好她再奪視后，她笑說：「依家言之尚早，年底仲有好多大劇出街。其實要演機械人，我都冇乜信心，都係摸着石頭過河，出到嚟觀眾鍾意，我覺得仲想點，唔會諗攞獎，有獎係Bonus，我滿足於現狀。」

回復單身的她，被問想找個男朋友還是再奪視后？她笑說：「我想搵個老公，唔係想搵男友，直接啲！事業係緊要，但係滿足現狀；感情就難控制，如果有得揀，梗係揀樣控制唔到嘅！」

對於曾志偉榮升無綫總經理，她說：「冇留意高層變動，但升職、加薪係開心事，對我就冇乜影響。我唔係主動嘅人，自己長處都唔知，好似以前都唔知自己適合拍劇，都係拍過先知原來可以。」另外，有傳前無綫高層余詠珊回巢有線，有意招攬她，Ali揚言與無綫仍有數年合約，無意他投：「完全唔知有呢件事，一直冇私下聯絡。」