林智樂自爆婚訊！姚焯菲商場開P 逾200人合唱慶生

本月22日15歲生日的Chantel與昨日18歲生日的林智樂，出席在商場舉辦的生日派對，現場逾200人為他們大合唱生日歌，Felix收到粉絲送贈的蛋糕和香檳，Chantel則收到歌迷會捐款到慈善機構的證書作為禮物。

Felix在台上透露前晚在社交網上載了翻唱葉蒨文《零時十分》的MV慶祝生日，不過竟一時口誤將生日講成結婚，惹來全場嘩然！他受訪時澄清並非要結婚：「如果18歲就結婚，人生太慘，我仲未拍過拖！（生日願望想拍拖？）唔會，現階段以工作同學業為重。（點樣慶祝生日？）會同家人食飯，跟住要排戲。」

至於有份拍劇的Chantel因為要返學，所以要遲些才開始拍攝工作，問到日前如何慶生？她說：「同屋企人食飯。今年生日好難忘，收到好多禮物，其中一份禮物係粉絲捐錢畀慈善機構幫啲小朋友上興趣班，好有意義。（會唔會叫粉絲將整巴士站燈箱嘅錢用喺慈善上？）佢哋送嘅禮物我好鍾意，如果放喺有意義嘅事上面，我會更開心。」提到另一學員炎明熹已有個人作品，Chantel戥對方高興，同時大讚其新歌好聽，希望自己也早日有個人作品。