新戲煞科 樂極忘形 姜濤香檳亂射 與毛舜筠街頭混戰

姜濤與影后毛舜筠前晚於灣仔為英皇電影《阿媽有咗第二個》拍攝煞科戲，劇組人員一早到場擺位，至晚上11時左右，兩位演員正式埋位開工，姜濤經理人花姐及一班「姜糖（姜濤粉絲）」亦有到場觀看拍攝情況，為免影響進度，工作人員不時向遠處的「姜糖」示意不要拍照。

約個多小時後，劇組宣布完成拍攝，工作人員亦開始收拾拍攝器材，隨即擺放摺枱及放上多支香檳，準備舉行小型煞科派對。當演員及導演先後發表感言後，隨即掌聲四起，期間更有人大叫「多謝英皇」，之後大夥兒排排企影大合照。病後初愈的姜濤心情興奮，百厭地拿起枱上香檳，邊跳邊狂力搖晃，並走近花姐欲「發炮」，花姐見狀即醒目閃避，他行動失敗之餘竟成被攻擊目標，另一邊廂的毛舜筠已靜悄悄準備就緒，見姜濤折返即向他狂噴，他也不甘示弱進行反擊，雙方隨即於街頭混戰，還一度跑出馬路，嚇得花姐大叫：「姜濤返嚟！」姜濤即捲土重來進攻花姐，成功噴得她滿面香檳，她忍不住咆哮：「同我殺咗佢！」搞笑非常。

姜濤對於該片能順利完成既開心又不捨，不過即將為演唱會綵排的他，應未能享受假期。雖然他於限時動態上載靚仔自拍相慶祝煞科，實行慰勞專程到場陪拍戲的「姜糖」，惟毛舜筠卻唱反調，上載他瞓到反白眼的相片，似乎要還擊上次被偷拍瞓覺相一事，認真大細路。