阿媽狂讚高富帥 戴祖儀絞盡腦汁 翻撻涂毓麟

戴祖儀（Joey）跟涂毓麟（Oscar）首次跨公司合唱復合情歌《我們再不講再見》，為唱出真感情，沒有經歷復合的2人絞盡腦汁投入唱歌，Joey自稱靠想像力，Oscar則向身邊朋友取經︰「喺朋友圈入面我係『感情台』，佢哋有咩問題都會搵我傾，咁就啱晒！」

他們於MV中飾演雙方前度，之後在朋友婚禮上重遇。現實中，Oscar自爆試過「偶遇」舊愛，地點正是莫文蔚演唱會，嚇得他內心大叫「瀨嘢」︰「睇睇吓騷，唔知點解部電話會自動連接咗去個ex嘅個人熱點，即係代表佢坐喺附近。（搵到對方？）搵唔到呀！隔籬朋友專登搵勻全場，但都見唔到，嗰刻我唔敢周圍亂望，視線淨係望實舞台。（分手分得唔好，所以做唔成朋友？）都係，因為細個唔成熟，鍾意鬧交。」

合作一次便被粉絲推舉成螢幕情侶，Joey笑言喜出望外，又指有粉絲每年的生日願望都獻給她︰「希望我識多啲男仔。（有冇介紹男仔你識？）絕對大把！但我發現咗個真理，通常由朋友介紹嘅都係伏！」問到有否機會跟Oscar「通電」？她自爆母親激讚對方︰「佢係高富帥，我媽咪對我好嚴，從來都唔讚我，但係就瘋狂讚佢靚仔又高大，讚到天上有地下無咁！（考慮？）佢細我幾年，諗吓啦，哈哈！」