「Tag就係揀咗咩」 吳卓羲拒認愛 菊梓喬冇「情」講

單身一段時間的吳卓羲（Ron）疑似與菊梓喬（Hana）擦出愛火，昨日他出席好友梁競徽鐘錶店開幕剪綵活動，雖然現場有視后胡定欣、劉穎鏇、鄺潔楹、江嘉敏、戴祖儀、陳敏之、陳山聰及陳自瑤等，但也不及他搶Fo。

不過，在場傳媒問是否要恭喜他時，Ron卻反問：「點解要恭喜？」澄清只是一場誤會，並否認拍拖：「其實識咗佢好耐，唔記得咗加佢社交網，以為Tag咗就係Add咗佢。（網民估今次係你舊愛張馨予翻版？）諗多咗，唔知Tag一Tag網民咁大反應，我哋同鄧智偉有共同朋友，唔好諗太多。（引嚟好多揣測！）我都有睇，諗住今日見大家一次過澄清。」問到對Hana可有好感？他說：「佢唱歌好聽，希望可以合作！（鍾唔鍾意呢類型女仔？）唔講呢啲，仲揀緊，工作冇咩時間。（發展空間？）唔講呢啲。（依家單身？）感情嘢唔講，專心工作，平時唔係好搞社交網。（同佢溝通呢件事？）有講吓，冇乜嘢。（佢好失望？）係一場誤會，冇啦！Tag就係揀咗咩，咁Tag完咪要結婚？」

這邊廂的Ron拒認愛，Hana昨日受訪時亦願意配合：「佢話感情事唔講，我都唔講，大家專注工作，睇到佢訪問仲話揀緊（女友），咁快啲幫佢澄清。」問到可有跟Ron拍拖？她說：「如果我係佢女朋友，佢就唔會話揀緊啦！」不過她承認有追求者，現在考慮階段中，是否包括Ron在內？她說：「大家唔好咁多猜測啦！（如Ron追求，可會考慮？）大家諗多咗！」

至於與Ron合作新劇的老友胡定欣，昨日獲悉好友因不懂玩社交網，惹來有新戀情之嫌，即忍不住取笑：「原來唔識玩社交網，尋日開工都見到佢，Bosco（黃宗澤）都喺度問咩事，咁恭喜晒！（有冇見Hana嚟探班？）冇！一場兄弟唔好意思踩多腳，識咗咁耐，都希望佢快啲搵到心中最愛。」更笑指對方沒有關注她的社交網，山聰、敏之等人聞言也起哄指未被Ron關注，場面搞笑。