昔日東方摸PetPet：曾患肺炎 2度險死 愛犬冧掂父母 Aka呻冇晒地位
組合Super Girls隊長Aka（趙慧珊）育有1歲玩具貴婦狗Froyo，細細粒加上灰黑色毛，十足毛公仔般可愛！首次養狗的Aka難忘愛犬出世不久便徘徊生死邊緣，更2度險死：「佢有肺炎，2、3個月已經入醫院，醫生話佢應該過唔到嗰晚，我好擔心，話幾多錢都要救番佢！最後佢留喺醫院，好大命苟延殘喘。」之後醫生指Froyo不肯進食，她便帶了愛犬最愛的朱古力味營養膏：「佢一食之後就咩都肯食，跟住就好番，真係好彩！」
Froyo現時非常健康，趙母更當正牠是女兒，Aka笑指愛犬嗲功一流：「我媽咪咳、打乞嗤或隻腳坐痹咗，Froyo即刻走去舔佢。」但愛犬從不會這樣待她，全因她飾演醜人角色：「我會惡，佢就會驚，屋企佢淨係聽我一個講，佢有啲公主病囉，被媽咪寵壞晒。」有晚她不開心流淚，以為愛犬會安慰她，怎料被漠視，並指父母當愛犬是金叵羅：「如果我同佢唔小心撞埋一齊，爹哋媽咪第一時間衝去Froyo度，問佢有冇事，但冇人理我，我係全屋最低地位！」
忘記被狗咬陰影
溫柔的Froyo百分百是「公主」，更教Aka做淑女，她表示：「佢食嘢好斯文，跌咗啲食物喺碗隔籬會食番，你唔小心踩到佢，佢會細聲溫柔咁叫一聲。」續讚愛犬聰明：「我未起身佢就喺房門等我，我好細聲撳電話，佢一聽到就會抓門，話畀你聽佢知你醒咗。」之前Aka曾被狗咬傷，她坦言一開始都驚被Froyo舔：「但依家冇乜嘢，佢畀到我太多歡樂，忘記晒陰影！」
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
