關楓馨贏「至Like佳麗」獎莫韻諰谷胸舞衣尷尬洩鴻溝

一眾候選港姐昨日性感出席公開活動，當中莫韻諰驚現「左右胸分離」，事後尷尬表示是天生，但滿意身體每部分。至於關楓馨則憑舞藝，在觀眾票選環節中脫穎而出，率先捧獎！

無綫昨日安排一班準港姐現身荃灣，與市民近距離接觸，席間與導師林浩文及袁鎮業分組一展舞技，爭奪「現場觀眾至Like佳麗」，結果由關楓馨先拔頭籌，而陳聖瑜則因病缺席。

關楓馨事後表示上台時心情緊張，因沒有跳舞底子：「可能最近綵排練習多咗，身體柔軟咗，總決賽當晚一班佳麗都會一齊跳舞。（有冇信心？）我會盡力。」

「有料」陳懿德幫口

莫韻諰穿上大會安排的吊帶紗裙谷胸現身，竟出現另類「深溝」，左右胸「離行離列」，她受訪時起初有點尷尬，其後大方說：「可能我個胸生得冇咁集中，又冇整理到夾埋一齊。呢啲係天生嘅，點解會咁就要問上帝同父母，不過我對身體每部分都好滿意，亦都好欣賞陳懿德嘅（豐滿）身形。」在旁公認「有料」的陳懿德即幫手解圍，揚言互相欣賞：「我都好欣賞莫韻諰嘅腹肌！」又說：「近日同一班佳麗練習跳舞，諗起完咗比賽大家就各散東西，我一時感觸喊咗出嚟。」

至於被視為大熱的宋宛穎與梁凱晴同樣擔心會於總決賽失準，宋宛穎說：「始終冇得準備吖嘛！但都對自己有信心，呢排由朝早8、9點綵排到深夜。」對於陳聖瑜缺席，她說：「佢突然生眼挑針，要去醫院放膿，嚟緊7日唔可以化妝，變咗獨眼龍，但佢都有同我哋一齊綵排，其實我好掛住佢。」梁凱晴接着說：「最緊要我哋齊齊整整，總決賽能夠齊齊參加。」