與黃嘉樂邊「做」邊傾 湯洛雯勾三搭四 男友嗌加油

靚湯、張寶兒、蘇皓兒及黃嘉樂等，昨午出席無綫新劇《OPM》開鏡拜神，靚湯與嘉樂首次合作即扮演夫婦，更有「踩界親熱戲」。嘉樂與靚湯男友馬國明私交甚篤，問到今次與「阿嫂」合作有否尷尬？靚湯即搶答踢爆：「之前佢同我講有啲緊張。（你有同馬國明交代？ ）有提過吓，不過佢唔會嚟探班，掉番轉係我都一樣，唔想畀壓力其他演員。」

談到親密程度，靚湯說：「夫妻間正常嘅嘢，邊『做』邊傾偈囉！我同嘉樂唔算好激，後來交代我哋離婚，我要色誘黃子恆，所有嘢都採取主動。馬國明都覺得拍呢啲戲男仔比較尷尬，因為好驚畀人講。我同嘉樂拍之前，佢都問我可唔可以錫你塊面一啖！」問到嘉樂可擔心女友呷醋？他說：「佢反而好開心，因為可製造話題，對我嘅事業有幫助。（有冇同馬國明交代？）拍之前佢仲傳短訊叫我加油！」此話一出，全場忍俊不禁。

而張寶兒今次飾演財經記者，自爆中三已開始投資美股，談到資金從何而來，她說：「唔係屋企畀，係靠自己儲嘅。（係咪咁多年投資都冇試過損手？）有時計季度冇賺咁多囉。（依家仲有玩美股？）可能冇深夜起身睇，平日喺電子工具set時間，自動操作。」至於蘇皓兒則自爆今年終於儲到「首期」投資買股票，不過撞正上落市，慨嘆「慘遇滑鐵盧」：「不過帳面啫，冇放到就冇事，不過我諗都要向寶兒學習。」