藉新碟表白？AGA：想試吓一見鍾情

日前AGA接受專訪時預告新碟會勇於表達情感，當中包括愛情，問到家人有否催拍拖？她笑言沒有，父母一直都很支持她行音樂路，然而她突然自爆有物色中的對象，激罕談愛情部分：「我係一個比較慢熱嘅人，要時間溝通，如果另一半都鍾意音樂會比較好，就算佢未必聽我嘅歌，哈哈！」又自覺事業心重，對方可能要體諒她工作狂的性格：「圈中、圈外人都冇所謂，對方又可能係自己好朋友，我唔係會一見鍾情嘅人，但都好想試吓呢個感覺。（渴望組織家庭？）I think so，我好睇重家庭、好鍾意小朋友，遇到啱嘅對象都會想生兒育女。」

出道8年，她自揭曾有段時間陷入樽頸位，試過突然冇「墨水」毫無創作靈感，加上曾被監製「恐嚇」，自我要求高之下壓力無比：「最難拿捏、最驚嘅係唔知下一隻碟做啲咩好，每次寫完都覺得可能係我最後一首歌，監製有同我講過好多唱作人寫到第3隻碟之後會覺得困難，的確當我開第4隻碟嘅時候壓力好大，落筆嗰下唔知自己仲有冇，好彩之後又寫到！」並笑言這恐懼感其實可鞭策自己更進步，形容感覺如洋葱被一層層慢慢撕開，逐步窺探內心世界。