戴祖儀百年難得一露搶菊梓喬風頭

環球「百萬點擊女王」陳凱詠惡鬥「百年難得一露」的戴祖儀！前者以歌藝取勝，後者激罕谷出強勁事業線，風頭蓋過同場賣萌的「星夢一姐」菊梓喬以及自爆食精神科藥物的谷婭溦！樂壇新一代來勢「胸胸」，不容忽視！

菊梓喬（Hana）、谷婭溦、陳凱詠（Jace）、戴祖儀及譚嘉儀等，前晚齊集電視城錄影《2021勁歌金曲優秀作品第一回》，身為「星夢一姐」的Hana貴為公司「攞獎王」，在場不停舉V賣萌，可惜打扮平實，被2位性感同門搶盡「峰」頭！當中戴祖儀激罕着低胸裙，笑言露深長事業線是「奇景」，連同樣拋胸的譚嘉儀亦睇到嘩嘩聲！

戴祖儀受訪時怕醜着褸「封胸」，她說：「人生大事呀！初嘗性感，好大方！其實係自己大頭蝦，未試裙就直接着，上網睇到啲Model着得好靚，點知低估咗自己！」對於被讚「猛料」，她笑說：「真係好少行性感路線，下次咁着就係百年後，哈哈！（總選再性感啲？）睇吓嗰日有冇試裙啦！」

陳凱詠捧「第一獎」

而Jace的熱爆歌《I Wish》是無綫與3大唱片公司破冰後，第一首獲「勁歌優秀作品獎」的得獎歌，故成為焦點，她說：「有啲緊張，第一次拎，唔知要做啲乜。」而她之前的《天生二品》、《隔離》及林家謙合唱版，在網上平台均有逾百萬觀看次數，被封為新一代「百萬點擊女王」，問可有信心攞更多獎？她謙稱很難預計。

至於早前發生被打「空針」醫療事故的谷婭溦，自爆接受精神科治療，但只食藥不想打針，又指醫生教她自我催眠治病：「每朝起身都催眠自己『我好健康、我一啲事都冇』，情況有好轉，之前成日都好驚，慢慢畀自己唔好太大壓力。」