昔日東方拍完劇斷聯絡 何依婷閘開羅天宇：唔想有無謂關係
被喻為「女神收割機」的羅天宇再傳緋聞，被指與何依婷因合作而撻着，更在劇集煞科宴拖手仔！不過2人齊聲否認，女方更揚言私底下沒聯絡，言談間與羅天宇劃清界線！
現年33歲的羅天宇，前度個個都是「女神」級，繼先後承認與苟芸慧及湯洛雯拍拖後，又與陳瀅和戴祖儀傳緋聞，艷福不淺！近日再傳出他拍攝新版《十月初五的月光》期間因利乘便，與女主角兼港姐出身的何依婷撻着！
有指2人開工期間朝夕相對，不時細聲講大聲笑，其後在煞科宴上躲在一角情不自禁拖手，又一起玩夾公仔，令甜蜜關係曝光。不過由於羅天宇形象花弗，有指何媽媽眼見女兒獲力捧，前途一片光明，不欲她因拍拖而荒廢事業，分分鐘棒打鴛鴦！
拖手仔只係劇情
何依婷昨日受訪時矢口否認戀情，更直呼冤枉：「同佢唔係好熟，拍劇係朋友，大家都係工作上好努力嘅人，我唔想同工作拍檔有不必要嘅無謂關係。夾公仔係劇情，唔係私底下相約，完咗工作後私底下冇見過面，成件事好無聊，希望大家唔好亂諗啦！（喺煞科宴偷偷拖手？）拍劇嗰陣有囉！但完咗就完全冇聯絡喇！」
羅天宇亦口徑一致，他說：「其實我單身咗好耐，可唔可以唔好咁樣寫我，搞到個個都覺得我好多感情發生咁，其實唔係，我不嬲都自己一個。（快啲搵到真命天女？）暫時未遇到，開劇好忙，出現嘅時候再算，總之依家未有囉！」
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
