太極騷唔齊人留憾雷有輝哭悼故友

殿堂級樂隊太極一連2場《Rainbow After Rain演唱會》前晚在紅館開鑼，嘉賓張敬軒、周慧敏、樂隊ONE PROMISE及駱振偉等，在紀念已故成員唐奕聰（Gary）環節輪流上台，獻唱對方的作品，而MIRROR人氣成員Anson Kong則在Encore時登場，炒熱氣氛！

爆Gary笑料

期間雷有輝（Patrick）自爆幾年前曾在一次飯局吵大鑊，朱翰博（Ricky）笑指可能紅酒唔靚，搞到大家酒精「上頭」，2句衝撞後險動武。他們又踢爆Gary每次出埠都最「盡興」，有次去澳洲演出，他飲醉後反鎖於廁所內攬住馬桶狂嘔，最後要Ricky及鄧建明（Joey）爬入廁所拖他出來，豈料「HiFi德」劉賢德再爆料：「喺澳洲佢試過2次㗎！第2次係我同張衞健拖佢出嚟！」

演唱會尾段，Patrick感性表示若非演出延期就可以齊人，雖然少了一名隊友，仍會堅持行落去，並感謝在場的Gary太太：「有佢先有Gary，先有咁多動人作品、美好樂章留畀大家回憶。」隨後唱《一生不再說別離》時，他一度痛哭至唱不下去，而Joey亦眼濕濕，場面感人！騷後Patrick指唱《一》時聽到Gary把聲即淚崩：「佢把歌聲真係殺死我！」而Joey則自認是當年險跟Ricky開拖的人。