高海寧「髮」揮麻甩本色 黃翠如失控減磅 林夏薇生人勿近

黃翠如、高海寧、林夏薇、陳曉華、江嘉敏及劉佩玥等主演的無綫劇集《七公主》，今晚8時30分於翡翠台首播。劇情講述7位不同年齡層的女性因特殊任務相遇，從彼此身上學習，繼而解決自身問題的勵志故事。眾人的姊妹情描繪深入，加上部分劇情牽涉全城熱爆的劍擊運動，令劇迷相當期待。

監製陳維冠今次全新打造一眾女角，發掘她們的另一面，例如將翠如化身鐵面女強人；高Ling收起女神形象，換來一頭短髮演粗豪司機；薇薇面對種種情緒起伏，令人揪心。劇集末段3人一場剖白內心戲為了連貫情緒，只能一take過拍攝，相當考演技。

談到今次演出，翠如表示最深刻是要極速瘦身：「因為我嘅角色對人同自己都好刻薄，商量後造型方面覺得起碼要減10磅，塊面最終見到腮骨起菱角，相信係我最瘦嘅一套劇。去到拍攝最後嗰個半月，我發現自己不受控制咁瘦，個狀態幾得意，但好配合角色。」

薇薇坦言今次是入行10年以來最大挑戰：「唔劇透太多，但我同徐榮、鄭子誠有段三角關係，佢哋兩個公餘時一直唔敢靠近我，驚影響我情緒。而我同徐榮經歷嘅，更加係正常想像唔到嘅嘢，希望觀眾見到全新嘅林夏薇。」

至於高Ling得悉要「落髮」，起初有點抗拒，但明白監製想法，竟主動再剪短，相當專業。據悉，拍攝時愈來愈「麻甩」的她有性感演出，但鏡頭罕有，且搞笑成分居多，觀眾要落足眼力留意。