神隱多時終復工 李麗珍睇粵語長片 療喪親之痛

李麗珍、黃又南與麥方喬（前名麥家琪）前晚出席電影《鬼同你住》首映，李麗珍雙親於一年內先後離世，神隱多時的她面對傳媒時頗為緊張，但狀態不俗，她坦言已回復心情：「控制到，唔開心嘅事要靠自己解決，搵啲開心事去填補。（用咩填補？）我煲劇，因為以前拍嘢錯過好多戲，70、80年代嘅戲都冇機會睇。我睇晒啲粵語長片，覺得特別舒服，因為以前嘅人簡單好多，我會代入自己喺嗰個年代，開心啲，反而自己演嘅劇少睇。」

她坦言這段時間獲女兒一直陪伴，是她最大支持：「佢依家從事設計工作，佢冇問我攞零用錢，仲主動畀家用，感覺好開心。佢大個女，唔想我擔心，知道我身邊發生咁多事，多謝上天賜個小天使畀我、守護我，否則我會好孤獨。」並指已重新投入工作，早前為溫碧霞投資的新片客串一角，之後又會拍新戲。

而黃又南指電影圍繞住屋問題，大嘆自己很想置業，但樓價太貴：「我唔係好大追求，夠住就得，2、300呎單位都可以，到時再樓換樓，想一家人一齊住，畀媽咪安心，我冇放棄，會繼續努力。」至於麥方喬近年甚少在港露面，笑言很多人以為她婚後不用工作：「因為暑假，所以返嚟香港一個月陪小朋友，我過兩日又走。（會唔會唔捨得？）會，但自己一個都幾開心。」又指遭老公投訴：「我最長試過走咗5個月，主要長駐佛山同順德，我郁慣，坐唔定。」