摸Pet Pet：鍾雨璇情緒崩潰愛貓出撒「手」鐧撫慰

歌手鍾雨璇的愛貓「白雪雪」是一隻2歲的布偶貓，回家一個月內便學識「give hand」和「sit」，深得全家愛錫，布偶貓優點是性格親民，歡迎任何人抱抱，不怕陌生，適應環境能力好強，故無論去到那裏都大受歡迎，鍾雨璇表示有兩位阿姨原本很怕貓，但就很愛跟牠共處。

其實白雪雪原主人是藝人陳蕊蕊，鍾雨璇分享與愛貓的相遇，她說：「年廿八做義工幫長者打掃時遇到陳蕊蕊，我知佢有好多貓貓，同佢講好想養貓，咁啱佢準備送走一隻，就係白雪雪，所以佢係半領養返嚟。」

由於愛貓很會Social，鍾雨璇覺得與牠相遇是由做義工開始，故打算帶愛貓做義工。她形容愛貓很有人性，並舉了一個例子：「有日我好朋友打電話畀我話佢患咗第四期肺癌，我已經忍唔住喊，因為同呢位朋友真係好好感情，收線後，以前嘅回憶返晒嚟，真係好傷心，呢個時候，白雪雪就跳上我肚上，又用爪摸我塊面同下巴，嗰一刻好窩心。」

想學動物傳心術

她說有時白雪雪的行為令她費解，試過有懂動物傳心術的朋友，替她與白雪雪溝通：「之前我買咗一啲零食令到白雪雪肚屙得好厲害，傳心師之後好清楚話畀我聽，白雪雪食咗邊種零食肚屙唔舒服，我換咗第二款零食之後，白雪雪就冇再肚屙。」而且傳心師還可以準確地描述她與白雪雪的日常交流細節，令她大呼神奇，故她直言想學傳心術：「好想同白雪雪好好溝通。」

白雪雪Profile

品種：布偶貓（雌性）

年齡：2歲

技能：舉手擊掌