C AllStar紅館騷洩密與林家謙搞曖昧

寰亞組合C AllStar前晚合體在紅館舉行一連兩場的《C AllStar集合吧演唱會2021》，4子用歌「唱」出各成員的性格，他們先笑釗峰：「喜怒形於色，但佛系點會嬲，依家釗峰係『釗即是虛，峰即是空』。」再笑他：「情愛、慾海、兒女私情睇化未？最多緋聞係佢。」輪到「唱」King，笑他11年來經常遲到，屬於「廢系」，他即反擊：「我唔廢，點顯得你哋勁？」釗峰笑他是「複雜嘅雙魚座」，他即自嘲是「鹹濕嘅魚」。

當晚有唱作歌手林家謙做嘉賓，他自揭與4子的「關係」：「同釗峰係細個發生……我哋係中學師兄弟關係，但冇見過；同King就係搞過幾次……remix；同On仔就係最早搞……我哋喺音樂會合作過；同Jase就係《沒明日的恐懼》。」4子落台前笑言：「我哋搞完佢啦，留畀你哋搞，但要溫柔啲。」被留下的家謙笑言：「驚驚哋，第一次紅館一個人唱，仲要四面台，真係好難搞。」

4子論盡落「天梯」

唱到《天梯》時，4子登上「天梯」，落樓梯時身穿長褸的他們論盡kick腳，要互相幫忙。及後唱到男團MIRROR的《IGNITED》時，全場開心跳起，釗峰及On仔更除衫騷肌，全場瘋狂尖叫！尾聲唱到《此刻無價》時釗峰感動落淚，4子攬在一起，場面感人。