江嘉敏嘆易肥難瘦冇得性感陳曉華保留Cosplay：結婚先至玩

江嘉敏密實打扮現身動漫節活動，稱10年前曾以吊帶短裙性感打扮玩Cosplay，當時得天獨厚食極唔肥，可是現時卻易肥難瘦。至於陳曉華則話人生只可以Cosplay一次，就係結婚的時候。

藝人江嘉敏、陳曉華（Hera）、簡淑兒、黃美棋、丁子朗等人，昨日齊齊到動漫節出席「myTV Gold•Ani-One新番動漫5周年慶典」，江嘉敏及Hera坦言愛睇動漫，問可會玩Cosplay？江嘉敏笑言：「冇，但10年前做嘢要Cosplay，大會安排咗套衫，其實都幾性感，吊帶低胸短裙，食極唔肥，但依家唔得啦，真係報應。」而Hera就透露人生可以Cosplay一次：「就係結婚嗰次，因為《百變小櫻》有套婚紗好靚，我好鍾意，可以着一次。」

簡淑兒怕醜講男友

而日前32歲生日的簡淑兒與男友麥大力度過拍拖後的首個生日，她一開始怕醜避忌謂：「陳婉衡同我搞咗個生日會，請咗我啲朋友、家姐嚟。（男友有冇份去？）都有。（已經融入家中？）大家一齊玩。」

講到男友教她揸飛機，她冧笑謂是對方送的生日禮物，問到可有其他禮物？她就說：「唔使其他禮物，其實我哋相處好簡單，唔使太多花臣。」

她指與男友的生活習慣和態度相當近似：「唔使刻意做咩去討好對方，普通相處已經好開心。（你哋咁夾幾時結婚？）我哋一齊咗兩個月咋。（可以閃婚？）唔會，我哋都係做嘢為先。」