死頂照搞簽名會 谷婭溦頭暈企唔穩 全日要人陪

早前險被打空針而兩度入院的歌手谷婭溦，昨日現身書展，為其CD加親自撰寫的小品舉行簽名會，獲十多名粉絲撐場，其表姊胡曦文與公司高層何麗全也有到場支持。

谷婭溦前日才出院，她於昨日看來雙目無神兼體虛氣弱，受訪時坦言身體仍不太舒服：「成個人好虛，暈陀陀。（出事後身體一直好差？）係，需要多啲休息，暫時未知咩事，因為第二次做嘅檢查未出報告，醫生開咗啲藥畀我食，叫我飲多啲水。依家要有人24小時睇住我，因為我連行路都冇力，好易跌親。（點解唔取消簽名會？）呢個活動準備咗好長時間，我簽完就走，唔會留太耐。」不過原定今日拍攝MV的工作就要取消。

她稱涉醫療事故的醫療中心曾聯絡過她一次，但仍在處理中，所以不方便多講。

另外，歌手夏韶聲與玄學家李居明於同日舉行簽名會，夏韶聲獲9歲大的孫仔撐場，而李居明則透露為鼓勵香港文化活動，今年一口氣推出5本書，並罕有地辦簽名會回饋讀者。至於陳倩揚就開講座分享減肥之道：「我喺網上開咗個群組，年半已經有12萬5千個會員，今次講座200個名額，一登記已經爆滿，希望之後可以再做同類型活動。」