炎明熹《聲夢》失準何晉樂「反彈」O嘴

無綫歌唱選秀真人騷《聲夢傳奇》戰況激烈，被視為冠軍大熱的炎明熹（Gigi）表現失準，反觀其兩大勁敵姚焯菲及鍾柔美則輕輕鬆鬆過關。至於上次險被淘汰的何晉樂，今次發揮高水準晉級，成績反超前！

《聲夢》參賽者炎明熹（Gigi）有「民選冠軍」之稱，惟在最新一集翻唱張學友的國語歌《吻別》時失準，更一度破音，評審認為她揀錯歌，主理人李克勤更直指她「魂魄唔齊」。雖然最終順利過關，但Gigi事後在社交網剖白心情，向粉絲致歉，當中對導師JW特別愧疚，她昨日出席活動時承認對自己的表現失望：「我唔知應該點樣面對自己，同埋教過我嘅人。」又坦言聲帶有勞損，但沒有大問題。

節目中，最後出場的何晉樂選唱《我不會唱歌》，並獲原唱李克勤親自教路。之前曾經嚴重失準的他今次來個大逆轉，獲得全場最高分，連自己都驚訝到O嘴，至於最低分的林君蓮則被淘汰。

文凱婷孫漢霖撻唔着

另外2位人氣高企的參賽者姚焯菲（Chantel）及鍾柔美表現大勇，雙雙取得高分順利過關。對於靚仔爸爸被起底，Chantel昨日受訪時表示：「多謝大家，希望將焦點放喺我唱歌方面。」至於有機會殺入總決賽的文凱婷被克勤踢爆與已遭淘汰的孫漢霖撻着，2位主角昨日一同受訪，澄清「戀情」是美麗的誤會，因大家屬同隊又年紀相若，話題較多才引起誤會。問到可有發展機會？他們沒有落閘，但坦言暫時未見到有花火。