馬貫東獲讚「最驚喜」門將 蕭正楠球王上身 狂扭有士哥

無綫《明星運動會》足球項目日前圓滿結束，藍、綠、紅隊分別由徐榮、楊潮凱及黃子恆領隊出戰，爭奪獎牌。紅隊成員蕭正楠不負眾望，過關斬將取得首個入球，之後他更以1敵2，為隊友製造入球機會，阿蕭昨日受訪時坦言：「我係波牛，由細到依家都咁鍾意踢波，細個平均3、4個月就踢爛一對皮鞋，呢排有同徐榮、黃日華踢波，今次球賽好好玩，啲同事簡直接近專業水平。」

藍隊亦有實力超卓的隊長徐榮與隊員黃庭鋒、馬貫東。黃庭鋒曾是校隊代表，主力前鋒位置；馬貫東今次擔任守門員，及時阻止敵方攻擊，更被香港足球隊前代表潘文迪封為「最驚喜球員」。

馬貫東坦言：「嗰日好開心呀！平時自己有踢嘅，總之一得閒就會去，不過呢排忙於拍劇少咗，賽前冇特別去準備，抱住一個享受友誼賽嘅心態去踢！」說到守龍門壓力大，他說：「守龍最難係集中力，好講求反應，因為攻勢係突如其來，一失誤就好難有人幫到。」

而徐榮向來都是足球猛將，他說：「平時有踢波，1星期都會踢1、2場，因為自己有跑步同踢開，所以賽前唔使點準備。（今次同班同事落場跟平時有咩唔同？）有樣嘢好唔同，我初初喺TVB踢波時，係隊入面最後生嗰個，隔咗咁多年後，嗰日睇勻3隊，自己變成最年長嗰個，感覺時光飛逝。」至於綠隊隊長楊潮凱擅長掟界外球，力度十足，加上有「坦克車」潘梓鋒衝刺力強勁，成為秘密武器。