昔日東方拍劇初哥壓力爆煲 陳曉華抹乾眼淚 學戲吐烏氣
陳曉華出道後工作冇停過，早前難得不用開工，即喪做運動，望鍛煉好身體。剛學網球不久的她笑言不怕曬黑，更自封「陽光女孩」。
前港姐冠軍陳曉華（Hera）中學時期讀女校，四肢發達卻手腳唔協調，早前趁未開劇，她一次過學踩滾軸溜冰、網球、跆拳道等，活力驚人！她受訪時說：「入行後一直未停過工作，之前休息大半年，發現自己身體機能幾差，所以學唔同運動，想練番好個身體。」
運動強身 唔怕曬燶
日前她相約教練打網球，每次擊球都相當有力，絕對不容小覷，她認叻說：「讀書時期，我除咗游水之外乜都玩，籃球、排球、羽毛球、乒乓波都有，仲跟阿哥去踢波。之後大學要讀書，身邊又冇乜朋友陪做運動，所以身體差咗好多。」打網球容易曬黑，不少女仔都怕怕，但她卻大無畏：「好少女仔唔怕曬，但我唔怕，因為我易黑易白。好多人覺得我好柔弱、斯文，但完全唔係，我係陽光女孩嚟㗎！我都宅，但亦好鍾意做運動。」
Hera現正忙於拍攝新劇《廉政行動2022》，問到之前停工時會否很徬徨，她表示還好，並趁機學戲惡補一下，談到之前被批評講對白差，她說：「老師話我唔能夠發自內心，依家拍劇會將學到嘅應用落去。」又坦言《迷網》播出時壓力很大：「嗰陣拍緊《異搜店》，唔知點改善。第一次拍劇一竅不通，真係好迷惘，之後好多前輩指導我，拍《異搜店》時對自己要求都高咗，想做得好啲。（壓力爆煲？）一開始有呀！拍《異》時好驚，試過休息時會喊，又試過食食吓飯去廁所喊，覺得自己點解做極都做唔好，不過應該冇人發現我去咗喊。」
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
