莫文蔚等足35年學友攬人妻要獲批

莫文蔚前晚紅館騷尾場，碌盡人情卡邀請「歌神」張學友任嘉賓，自爆此機會等足35年，又提起曾為對方伴舞，而學友則搞笑表示攬她前已問准其夫，笑翻全場。

走足3年的巡唱終於以香港尾站完美落幕，莫文蔚（Karen）演唱期間多次流露不捨之情，唱至《HEY!如果……》更一度哽咽，不過她向Fans派定心丸強調不是要封咪，並約定大家於另一個舞台相遇。全晚她共邀請3位嘉賓，打頭陣有李克勤，她道出二人曾是師兄妹關係，是對方帶她入行。當介紹「歌神」張學友出場時，她笑指等了對方35年，學友隨即現身，掀起全晚高潮，二人甫見面即攬攬，學友搞笑表示已得到對方德籍老公Johannes允許才擁抱。

老公伴奏錫錫放閃

Karen憶述中學時期曾訪問過學友，出道前又曾以「學生妹」身份為對方伴舞，學友即不禁笑問：「點會有呢啲咁靚嘅學生妹？我冇向你有表示咩？係喎！我嗰陣已經唔得喎！」引起現場一片笑聲。個唱尾聲時，兩公婆同台合奏鋼琴，之後於老公伴奏下唱《再生》，情到濃時更送上肉嘴，大放閃光彈。

騷後她於後台受訪，問到會否收回最後演唱的宣言？她再次重申只是想轉用另一方式呈現演出，例如做音樂劇、搞網上騷：「學學友講，可能有個新場地比紅館大，我話唔做大型演唱會啫，改做巨型演唱會！」提到今次老公上台表演，她即冧讚另一半犀利，首次演出非常淡定，並已諗定報答方式︰「交番個人畀佢！自己都要休息吓。」

她亦首度開腔回應新歌《婦女新知2021》MV中身穿涉及辱華品牌的服裝而惹爭議一事，她自言感內疚，指今次是好好的教訓：「今次真係我疏忽，冇得賴。平時着衫我真係唔Care咩品牌，但其實係需要Care，以後呢啲最細微嘅位都要留意。」提起出事造型由馬天佑的工作室負責，她即出言護友。