產後谷胸復工 岑麗香餵人奶 每日瞓得4粒鐘

岑麗香、陳自瑤（YoYo）、吳業坤、張頴康、商天娥、龔慈恩、黃文意等，昨日到電視城宣傳無綫新劇《寶寶大過天》，男主角馬國明因身在內地而未能出席，期間透過電話訪問，笑言被公司急召，很快返港跟大家見面。

谷胸上陣的香香誕下細仔後首度現身，坐完月不久的她身形甚弗，但自嘲收身未成功，家裏只得一條褲「啱身」。首次演媽媽的她表示：「記得有場戲送個女返學，佢一開始返學係咁喊，到後來習慣咗，就好快咁同我講聲bye就擰轉頭走，當時我要演繹又想笑又想喊，但自己未經歷過。到呢幾個月，2歲幾嘅大仔返學就係咁，好唔捨得，但又感動佢大個仔。」

談到劇中有囡囡，問到現實中可想追個女？香香笑言：「畀我搞掂呢個先，聽神嘅安排，順其自然。依家呢一、兩個月最忙，唔好諗住。」現時餵人奶及奶粉的她坦言，每日只能「斬件式」睡3至4小時，幸好有老公強強幫手：「佢會擺定啲奶粉，又預備晒奶樽，用最快嘅速度餵奶。」

而YoYo表示於劇中有多場情緒崩潰的內心戲，感激拍檔張頴康鼓勵：「佢話我個角色好有發揮，叫我加油，仲話會喺側邊back up我。」並指為了飾演師奶角色，近乎素顏上陣。又透露7月拍時裝劇，問到是否因得到汪明荃「加持」而多了演出機會？ 她笑言無論如何都會多謝對方。至於吳業坤與黃文意演夫婦，問到可有親熱戲？他笑言：「冇，佢話好可惜，我操得咁辛苦。」