大律師返TVB蕩失路　朱千雪「幸福肥」冇膽着泳衣

朱千雪昨日與師妹馮盈盈、陳曉華、陳楨怡及郭柏妍在將軍澳電視城出席《2021香港小姐競選》之「最後召集」記者會，朱千雪表示參加港姐不知不覺已過了9年：「選港姐最大得着係經驗，個訓練喺演藝或其他行業都用得着，同埋選港姐會做好多一世都唔會諗住做嘅嘢，例如着泳衣、才藝表演，可以練膽量。」又笑言現時回想起來都覺得當年很大膽：「嗰陣唔為意着泳衣會尷尬，或者自己夠唔夠瘦或靚，但依家冇本事再做啦！（因為結婚後幸福肥？）其實比起結婚前差唔多，但依家工作冇郁得咁多。」

她又笑說年多沒回來公司，竟在停車場迷路。問到可會想再拍劇？她說：「睇公司同時間安排，暫時未有計劃。（有戲癮？）有時都掛住fans、記者、同事，始終喺度都9年。」講到好姊妹岑杏賢有喜，她說：「係呀，好戥佢開心，覺得佢會係個好媽媽，因為佢好鍾意小朋友。（幾時到你？）順其自然，費事有壓力，好彩雙方父母都冇催。」提到婚後生活，她之前連蒸水蛋都失敗，笑言已惡補廚藝，現時中湯也難不到她：「收工仲會返屋企煮餐簡單飯，不過嗰陣學蒸水蛋，整咗十幾次，老公都講笑話係咪仲要繼續食蒸水蛋！佢煮嘢叻過我，覺得好簡單。」

而陳曉華及陳楨怡見到師姐朱千雪即雙眼發光，笑言要乘機集郵。講到快將卸任，陳楨怡坦言不捨得：「過得好快，好似啱啱選完咁，依家多番啲工作，好似之前先第一次做慈善騷司儀。（網民話你可以取代馮盈盈司儀地位？）唔係，自己有好多進步空間。」陳曉華則表示要為新劇《廉政行動2022》積極減肥：「我之前有3個月冇做嘢，肥咗10kg，磅完嗰日我全日冇笑過，之後不停做運動，用2個月時間減咗5kg。」