胡定欣風騷開餐行街打橫嚟

過氣緋聞情侶陳展鵬與胡定欣，最近為無綫劇《同盟》再合體宣傳，男方最近被爆與落選港姐單文柔撻着。至於未有着落的定欣最近跟幾位「胡說八道會」好姊妹赴澳洲拍旅遊節目，可算寓工作於娛樂。

前日下午，定欣、姚子羚和趙希洛等在黃竹坑出席活動後，再搵埋好姊妹李施嬅「全女班」到附近Cafe開餐。定欣在助手陪同下乘七人車最先到場，並攞定位坐低，其餘好姊妹泊好車便來會合，眾人坐低後即雞啄唔斷，嘻嘻哈哈，引來旁邊的食客眼望望，但她們一於少理，繼續細聲講大聲笑，心情不錯的定欣還笑到四萬咁口，狀甚風騷。

她們逗留約個多小時埋單走人，定欣與助手先步出，有粉絲要求合照亦有求必應，之後等埋幾位好姊妹出來，四條Queen突然一字排開邊行邊傾，幾乎封咗成條街，加上定欣、姚子羚和趙希洛均穿熱褲，露出六條白滑長腿，如電影《色慾都市》四位女主角招牌甫士，氣勢十足。期間再有粉絲認出眾人，定欣即拉埋幾位好姊妹大合照，還親自揸機。四女及後各自離開，定欣乘七人車由司機接載返將軍澳寓所。

文、攝：追蹤組