夏文汐「撐住灶君」 搞到扭親

藝人黎耀祥和夏文汐日前為無綫新劇《逆緣》拍外景，二人為首場雨中偶遇戲演出，劇組出動水車協助拍攝。夏文汐左腳踝受傷貼上藥貼，她自覺與風水擺位有關，又指新劇角色與現實生活同樣篤信風水：「最近搬入一個apartment，張睡床對住個廚房，即係對腳撐住灶君，唔太好，之後就扭親腳。」談到與視帝黎耀祥合作，她表示雙方雖未正式有對手戲，但感覺非常良好，連互望時的眼神也充滿電力。問到可習慣無綫拍劇的方式？她說：「慢慢習慣，依家最長一日都係拍12個鐘，有時唔使添！（錫住你？）係主景未有我咋！遲吓就知味道，預計打後個幾兩個月都要通頂拍，依家就先甜後苦。」